Ministan Abuja, Nyesom Wike, ya gargaɗi gwamnoni da sauran mambobin kwamitin yaƙin neman zaɓen shugaban ƙasa na jam’iyyar APC cewa kada su yi murnar nasarar Shugaba Bola Ahmed Tinubu a zaɓen 2027 idan sun gaza tabbatar da nasararsa a yankunan da aka ɗora musu alhakin jagoranta.

Gidan talabijin na Channels ya ruwaito cewa Wike ya yi wannan gargaɗi ne a ranar Laraba a Abuja, yayin ƙaddamar da kwamitin yaƙin neman zaɓen shugaban ƙasa na APC na 2027.

Wannan jawabi na Wike ya zo ne jim kaɗan bayan an naɗa shi a matsayin mai kula da ayyukan yaƙin neman zaɓen Tinubu a Abuja da jihar Rivers.

Ministan ya buƙaci mambobin kwamitin da su ɗauki alhakin tabbatar da nasarar ɗan takararsu a yankunan da aka ba su, yana mai cewa kowane mutum na da rawar da zai taka, ba tare da la’akari da matsayin da yake da shi a cikin kwamitin ba.

Wike ya jaddada cewa bai dace mutum ya gaza gudanar da aikinsa wajen neman ƙuri’u ga Tinubu ba, sannan daga baya ya fito yana murnar nasarar da wasu suka yi aiki tukuru wajen samarwa.

A cewarsa, nasarar Tinubu a zaɓen 2027 na buƙatar jajircewa da haɗin kai daga dukkan mambobin kwamitin yaƙin neman zaɓen, musamman waɗanda aka ɗora wa alhakin kula da jihohi da sauran yankuna.

Ya kuma nuna cewa matsayin mutum a cikin kwamitin kamfen ba shi ne abin dubawa kawai ba, domin abin da ya fi muhimmanci shi ne sakamakon aikin da aka ba shi.

Gargaɗin na Wike na zuwa ne yayin da jam’iyyar APC ke ƙara shirye-shiryen yaƙin neman zaɓen shugaban ƙasa na 2027, domin neman wa’adin mulki na biyu ga Shugaba Tinubu.

A matsayinsa na mai kula da kamfen a Abuja da Rivers, ana sa ran Wike zai taka rawa wajen tsara dabarun neman goyon bayan masu zaɓe a waɗannan yankuna.