Kungiyar kare haƙƙin Musulmi ta MURIC, ta yi kira da a dakatar da jarabawar da ake gudanarwa a dukkan cibiyoyin Makarantar Koyon Aikin Lauya ta Najeriya, sakamakon zargin cin zarafi, tsoratarwa da kuma hana ɗalibai mata Musulmi masu sanya hijabi shiga ɗakunan jarabawa.
Ƙungiyar kare haƙƙin ɗan Adam ta Musulunci ta kuma buƙaci gudanar da bincike kan abubuwan da suka faru, waɗanda rahotanni suka ce sun faru ne a lokacin jarabawar ƙarshe ta ɗaliban da ke neman samun shiga ƙungiyar lauyoyin Najeriya, a ranar Asabar, 31 ga Oktoba, 2026.
MURIC ta yi gargaɗin cewa za ta tattara iyaye, matasan Musulmi da sauran masu ruwa da tsaki domin gudanar da zanga-zangar lumana a cibiyoyin Makarantar Koyon Aikin Lauya da ke faɗin ƙasar nan, idan ba a biya buƙatunta ba.
Kawo lokacin haɗa wannan rahoto, Makarantar Koyon Aikin Lauya ta Najeriya ba ta mayar da martani kan zarge-zargen da aka yi mata ba.
Ƙungiyar ta bayyana matsayinta ne a cikin wata sanarwar manema labarai da wanda ya kafa ta kuma Babban Darakta, Farfesa Ishaq Akintola, ya fitar ranar Lahadi.
A cewar Akintola, an zargi hana wasu ɗalibai mata da ke sanye da hijabi shiga ɗakunan jarabawa a sassa daban-daban na ƙasar nan saboda tufafin da suka sanya na addininsu
