Amurka ta ce za ta saka takunkumi tare da hana biza ga duk wanda ta samu da hannu a zargin zaluntar Kiristoci a Najeriya.

Ministan harkokin waje na Amurka, Marco Rubio, ya bayyana a shafinsa na X cewa matakin martani ne ga abin da ya kira zaluntar Kiristoci, duk da cewa bai gabatar da hujjoji ba.

Ya ce:

“Amurka na ɗaukar mataki game da tashin hankali da zaluncin da ake yi wa Kiristoci a Najeriya da duniya baki ɗaya.”

Rubio ya ƙara da cewa ofishin harkokin wajen Amurka zai daina bayar da biza ga mutanen da ake zargi da tsara ko bada umarni ko ɗaukar nauyi wajen tauye haƙƙin yin addini.

Wannan mataki zai shafi Najeriya da sauran ƙasashen da ake zargin ana zaluntar mutane kan addini.

A ranar Laraba, wani kwamitin Majalisar Wakilan Amurka ya fitar da rahoto kan batun, inda wasu ‘yan majalisa suka maimaita ikirarin cewa ana kashe Kiristoci da gangan a Najeriya.