Shugaban kasa Bola Tinubu ya jaddada cewa, ba za a dawo da tallafin man fetur ba a kasar nan, inda ya ce gwamnatinsa ta dauki matakai masu tsauri domin inganta tattalin arziki.

Tinubu ya bayyana hakan ne yayin wata ganawa da kungiyar City Boy Movement, wata kungiyar matasa da aka kafa domin yada manufofin gwamnatinsa.

Ya ce ya janye tallafin man fetur ne tun a ranarsa ta farko, kuma yana jin alkawuran da yan adawa ke yi na dawo da tallafin, sai dai ya ce Nigeria za ta iya durkushewa saboda babu wasu kudi da za a yi amfani da su wajan biyan tallafin.

Da yake buga misali da batun da ya shafi addini da tarihi, Tinubu ya kafa hujja da kissar Alqurani da Bible, inda ya ce lokacin da Annabi Musa ya baro Misra, kuma Kogi ya rabu gida biyu domin ya tsallaka, to babu wanda zai iya cewa Musa ya koma Misra duk da sanin matsalar da ya baro a can.

Daga nan ya shedawa mahalarta taron cewa, tare da taimako da goyon bayansa, suma yan Nigeria ba za su koma Misrar da suka baro ta tallafin man fetur ba.

Tsohon gwamnan na jihar Legas, ya yabawa kungiyar a bisa goyon bayan da take bawa gwamnatinsa, inda ya bukaci wakillan kungiyar da su tallata nasarorin da ya samar ga alummar Nigeria.