Abba Atiku Abubakar, ɗan tsohon Mataimakin Shugaban Ƙasa kuma ɗan takarar shugaban ƙasa a zaɓen 2027 a ƙarƙashin jam’iyyar African Democratic Congress (ADC), Alhaji Atiku Abubakar, ya yi alƙawarin tabbatar da nasarar Shugaba Bola Ahmed Tinubu da jam’iyyar APC a babban zaɓen shekarar 2027.

Abba Abubakar ya bayyana wannan matsaya ne a ranar Juma’a, a hedikwatar jam’iyyar APC ta ƙasa da ke Abuja, yayin wani taron manema labarai da aka shirya domin bayyana manufofi da hangen nesa na ƙungiyar Haske Bola Tinubu Organisation (HBTO) a hukumance, tare da ƙaddamar da shirin tallafa wa jama’a ta hanyar samar da sufuri a farashi mai rahusa a Babban Birnin Tarayya (FCT).

Abba Abubakar, wanda shi ya kafa ƙungiyar kuma shugabanta, ya yi magana kan tasirin siyasa da ke tattare da goyon bayan abokin hamayyar mahaifinsa.

Ya bayyana cewa matakin da ya ɗauka zaɓinsa ne na siyasa mai zaman kansa, wanda ya dogara da ƙudurinsa da kuma abin da ya yi imani da shi, ba wai saboda alaƙar iyali ko dangantakarsa da mahaifinsa ba.“Na fahimci cewa matakan siyasa, musamman waɗanda suka bambanta da ra’ayin mutanen da mutum ke da alaƙar zumunci ko ta iyali da su, galibi suna jawo hankalin jama’a sosai.

“Duk da haka, ra’ayin siyasa lamari ne da ya shafi tunanin mutum, lamirinsa da kuma ‘yancin kowane mutum na yanke shawara da kansa.

Matakin da na ɗauka na kafa tare da jagorantar ƙungiyar HBTO, zaɓi ne na siyasa da na yi da gangan, bisa cikakken imani da alkiblar da muka zaɓa.