Duk da ruruwar rikicin cikin gida da ya dabaibaye jam’iyyar PDP, shugabancin jam’iyyar tsagin Kabiru Turaki a jiya Juma’a ya sanar da miƙa sunan Goodluck Jonathan da sauran ƴan takarar da zasu tsaya ƙarƙashin jam’iyyar yayin babban zaɓe na 2027 ga hukumar zaɓen.
Tsagin na Turaki ya bayyana cewa hannu da hannu ne ya miƙawa INEC takardun takarar na Jonathan dana sauran mambobin jam’iyyar.
Sai dai shugabar sashen wayar da kai kan zaɓe na hukumar ta INE Victoria Eta-Messi ta shaidawa manema labarai a safiyar yau Asabar cewa INEC ba zata amince da takarar da aka miƙa mata takardu hannu-da-hannu maimakon bi ta shafinta da ta buɗe ba.
A jawabinta gaban manema labarai, ta ce akwai buƙatar jam’iyyu su sani cewa INEC zata mutunta bayanan ƴan takara ne kaɗai idan an shigar da su a shafinta da ta buɗe don yin rijista.
Sai dai sakataren yaɗa labaran jam’iyyar ta PDP tsagin Turaki kwamared Ini Ememobong ya shaidawa manema labarai cewa INEC ta ƙi amincewa da basu damar yin rijistar ƴan takararsu a shafin da ta buɗe duk kuwa da yunƙurin da suka riƙa yi a lokuta da dama.
