Shugaban kamfanin Dangoye, Aliko Dangote ya yi gargadin cewa, rikicin gabas ta tsakiya zai iya tilastawa Nigeria da sauran kasashen Africa komawa aiki daga gida kamar yadda aka yi a zamanin Covid-19.

Dangote ya bayyana hakan ne bayan ganawa da shugaban kasa Bola Tinubu a gidansa dake Legas, inda ya bayyana damuwa game da tasirin tattalin arziki da kuma yanayin tashi da saukar farashin man fetur kan nahiyar Africa.

Da yake tsokaci game da tasirin rikicin, Dangote ya ce duk da yake lamarin bai shafi Nigeria ba kai tsaye, to amma kuma za ta iya jin tasirin yakin sakamakon yanayin farashin man fetur.

Ya jaddada cewa karuwar farashin makamashi zai shafi kusan kowane bangare na tattalin arziki, abin da ke nufin idan farashin ya ci-gaba da tashi to alumma za su ji a jikinsu.

Dangote ya kuma yi nuni kan yadda rikicin zai shafi lamurran yau da kullum na suniya, ciki har da sauya lokutan aiki da kuma fara aiki daga gida domin rage tsadar makamashi.