Kwamishinan Dindindin na hukumar zaɓe mai zaman kanta ta jihar Neja (NSIEC), Barrista Ahmed Mohammed, na ci gaba da kasancewa a hannun ’yan bindiga, watanni tara bayan da iyalansa suka biya kuɗin fansa naira miliyan 40 domin neman a sake shi.
An sace Barrista Ahmed ne a ranar 29 ga Satumbar 2025 a kan hanyar Mokwa zuwa Ibbi da ke Ƙaramar hukumar Borgu, yayin da yake kan hanyarsa ta zuwa Minna domin gudanar da aikin hukuma.
Lamarin ya faru kusan makonni huɗu kafin zaɓen ƙananan hukumomi da aka gudanar a jihar Neja a ranar 1 ga Nuwamban 2025.
Wani ɗan uwansa da ya zanta da jaridar Daily Trust ba tare da bayyana sunansa ba, ya ce bayan karɓar naira miliyan 40, masu garkuwar sun sake neman ƙarin naira miliyan 300 kafin su sako shi.
Majiyar ta bayyana cewa a ranar Litinin, ’yan bindigar sun sake tuntuɓar iyalan tare da tambayar ko sun shirya biyan sabon kuɗin fansar, sai dai iyalan sun shaida musu cewa ba su da ikon tara irin wannan kuɗi.
Shi ma wani abokin Barrista Ahmed, Ayuba Abubakar, ya ce iyalan sun yi iya ƙoƙarinsu wajen neman kuɗin fansa tun bayan sace shi, amma har yanzu ba a samu nasarar kuɓutar da shi ba.
Ya kuma bayyana damuwa kan rahotannin da ke nuna cewa lafiyar Barrista Ahmed na ci gaba da tabarbarewa yayin da yake tsare a hannun masu garkuwa da mutanen.
