Tsohon Gwamnan Jihar Borno kuma jigo a jam’iyyar APC, Ali Modu Sheriff, ya bayyana cewa tsohon Mataimakin Shugaban Ƙasa, Atiku Abubakar, ba zai samu goyon bayan Arewa ba a zaɓen shugaban ƙasa na shekarar 2027, yana mai cewa yankin ya yi imanin cewa mulki ya kamata ya ci gaba da kasancewa a hannun Kudu.
Da yake magana a shirin Politics Today na gidan talabijin na Channels, Sheriff ya jaddada cewa ya kamata a mutunta tsarin karɓa-karɓa tsakanin yankunan ƙasar, musamman bayan tsohon Shugaban Ƙasa Muhammadu Buhari ya kammala wa’adinsa na shekaru takwas.
Ya ce babu wani dalili da zai sa Arewa ta nemi kujerar shugaban ƙasa a shekarar 2027, yana mai cewa ya kamata Atiku ya dakatar da burinsa har zuwa shekarar 2031.
A cewar Sheriff, shugabannin siyasa sun amince da tsarin rabon mulki tsakanin yankuna ne bayan yaƙin basasar Najeriya domin ƙarfafa haɗin kan ƙasa da tabbatar da adalci tsakanin yankunan ƙasar.
