Babban Mataimaki na Musamman ga Shugaban Ƙasa kan Harkokin Yaɗa Labarai da Wayar da kan jama’a, Abdulaziz Abdulaziz, ya ƙaddamar da shirin “Gani Ya Kori Ji” a jihar Kano.

Shirin ya ƙunshi ziyarar duba ayyukan ci gaba a yankuna, da manufar nuna manyan ayyukan more rayuwa da ci gaban da aka aiwatar a Arewacin Najeriya.

Abdulaziz ya ƙaddamar da shirin ne a taron farko na Arewa Media Summit da aka gudanar a Kano.

Ya ce an tsara shirin ne domin cike giɓin da ke akwai wajen isar da bayanai, ta hanyar bai wa ‘yan jarida, masu amfani da kafafen sada zumunta da sauran masu ruwa da tsaki damar ganin ayyukan gwamnati da idanunsu, musamman waɗanda jama’a ba su lura da su ba.

A cewarsa, duk da dimbin kuɗaɗen da gwamnati ta zuba wajen ayyukan more rayuwa da sauran shirye-shiryen ci gaba a Arewacin Najeriya, har yanzu mutane da dama ba su da cikakken bayani kan waɗannan ayyuka saboda ƙarancin yaɗa bayanai.

Ya bayyana cewa shirin zai bai wa ‘yan jarida da masu amfani da kafafen sadarwar zamani damar tantance ayyukan da ake gudanarwa da kansu, sannan su gabatar wa jama’a rahotanni masu inganci da gaskiya.