Fiye da mutane 3,000 a Unguwar Guru da ke Unguwar Sukuntuni ta Ƙaramar Hukumar Kankia a Jihar Katsina, ne suka tsere daga gidajensu, kuma yanzu haka suna samun mafaka a gine-ginen da ba a kammala ba, makarantar firamare da kuma wajen ’yan uwa, sakamakon sabbin hare-haren ’yan bindiga.

Garin ya sha fama da hare-haren ’yan bindiga a cikin ‘yan kwanakin nan.

Sabbin hare-haren sun faru ne a ranar Asabar da Litinin, inda aka kashe mutane 13, sannan aka sace mata da ’yan mata da dama.

Mazauna garin da suka rasa matsugunansu, wadanda suka shafe fiye da kwanaki tara a kauyen Rimaye, sun shaida wa Daily Trust cewa sun bar gidajensu ba tare da kusan komai ba, kuma har yanzu ba su samu wani tallafi daga gwamnatin Jihar Katsina ko gwamnatin tarayya ba.

Muhammadu Lurwanu, wani mazaunin Unguwar Guru, ya ce an tilasta wa daukacin al’ummar garin wansa ke da mutane sama da 3,000, barin gidajensu bayan hare-haren.

Ya yi kira ga gwamnatin Jihar Katsina da ta gaggauta shiga tsakani tare da samar da abinci, tufafi, ruwa da sauran muhimman kayayyakin agaji ga mutanen da suka rasa matsugunansu.

Wani mazaunin garin, Yahaya Matsiga, ya bayyana halin da ake ciki a matsayin “mai matukar tsanani da tausayi,” yana mai cewa iyalan da suka rasa matsugunansu na matukar bukatar tallafin jin kai.

Ya zuwa karfe 3:00 na ranar Laraba, mazauna yankin sun ce wasu daga cikinsu ba su ci abinci ko sau guda ba.