Shugaban Ƙasa Bola Tinubu ya gana da shugabannin hukumomin tsaro na ƙasar nan, inda ya umarce su da su rusa dukkan sansanonin ’yan bindiga tare da ceto mutanen da aka sace.

Ganawar, wadda ta ɗauki tsawon sa’o’i, ta kuma mayar da hankali kan yadda za a samar da yanayin da zai ba da damar gudanar da babban zaɓen shekarar 2027 cikin lumana.

Da yake magana da manema labarai na fadar shugaban ƙasa bayan taron, Ministan Tsaro, Janar Christopher Musa mai ritaya, ya ce sun je fadar shugaban ƙasa ne domin yi wa shugaban ƙasa bayani kan halin da tsaro yake ciki a ƙasar nan, inda ya ƙara da cewa yayin da zaɓe ke ƙaratowa, yana da muhimmanci a sanar da shugaban ƙasa abubuwan da ke faruwa.

Musa ya ce dukkan shugabannin hukumomin tsaro sun halarci taron, kuma Shugaba Tinubu ya umarce su da su tashi tsaye, su gano tare da ceto duk mutanen da aka sace ko aka yi garkuwa da su, a duk inda suke.

Ministan ya ce sun tattauna sosai kan lamarin, kuma Shugaban Ƙasa ya bayyana karara cewa yana son a gudanar da zaɓe cikin ’yanci, adalci da gaskiya.