Rundunar yansandan birnin Abuja ta kama wasu yansanda 4 da ake zargi da karbar cin hanci na naira 53,000 a hannun shugaban hukumar yaki da rashawa ta ICPC, Dr Musa Aliyu, a wani shingen bincike da suka kafa a birnin Abuja.

Yansandan, wadanda rahotanni ke cewa ba su san wanda suka kama shi ne shugaban hukumar yaki da rashawa ba, sun tilasta ma Aliyu ciro kudin daga wani shagon POS kafin ya mika musu domin su raba a tsakaninsu.

Kwamishinan yansandan birnin Abuja, Ahmed Sanusi ne ya bayyana hakan yayin zantawa da manema labarai a Abuja, inda ya bayyana jami’an a matsayin yan ta’adda wadanda rundunar yansandan Nigeria ba za ta iya aiki da su ba.

A cewar Sanusi, yansandan sun yi watsi da aikin da aka basu, inda suka kafa shingen bincike a yankin Banex dake unguwar Wuse, suna tare motoci suna yi musu bincike da karbar kudi.

Ya ce shugaban na ICPC ya fada tarkonsu ne lokacin da suka tare shi tare da neman ya biya su kudi kafin ya wuce.