Gwamnan jihar Niger, Muhammad Umaru Bago, ya jaddada goyon bayansa ga ayyana wa’adin mulki sau daya kacal ga gwamnoni, matakin ya ce zai inganta sha’anin tafiyar da gwamnati.

Gwamnan ya bayyana hakan ne lokacin rantsar da sabbin shugabannin kananan hukumomi da mataimakansu, da kwamishinoni da wakillan hukumomi a fadar gwamnatin jihar dake birnin Minna.

Bago ya ce ba domin fargabar zaben dake tafe ba, da ya dauki matakai masu tsauri kan wasu jami’an gwamnatinsa, inda ya jaddada cewa idan shugaba ya san wa’adin mulki daya zai yi, to zai gudanar da mulkinsa ba tare da matsin lamba ta yan siyasa ba.

Gwamnan ya ci-gaba da cewa, akwai abubuwa da dama da ya ke son aiwatarwa amma kuma yana tsoron zabe mai zuwa, musamman korar wasu jami’an gwamnatinsa ba su da wani amfani.

A cewarsa, jami’an gwamnatin sun kasa a aikin da aka basu, kuma sun zamewa gwamnatin ala-ka-kai.