Mai bai wa Shugaban Ƙasa shawara kan Harkokin Yaɗa Labarai da Sadarwa, Sunday Dare, ya yi tsokaci kan cece-kucen da suka biyo bayan batun sayar da ƙosai, gasa masara da kuma yin ƙuli-ƙuli.
A ranar Juma’a, martani mai zafi ya mamaye kafafen sada zumunta bayan Uwargidan Shugaban Ƙasa, Sanata Oluremi Tinubu, ta shawarci ‘yan Najeriya da su rungumi ƙananan sana’o’i.
Ta buƙaci ‘yan Najeriya su yi la’akari da sana’o’i irin su suya da sayar da ƙosai, gasawa da sayar da masara, da kuma sarrafa ƙuli-ƙuli, tare da wasu ƙananan sana’o’i.
Cece-kucen ya ƙara ƙamari bayan wani bidiyon jawabin nata ya bazu a kafafen sada zumunta, lamarin da ya jawo suka daga wasu ‘yan Najeriya da suka ce kalaman nata ba su nuna fahimtar irin matsin tattalin arziƙi da wahalhalun da miliyoyin iyalai ke fuskanta ba.
