Jagoran Jam’iyar NDC na ƙasa kuma tsohon gwamnan Jihar Bayelsa, Sanata Seriake Dickson, ya yi kira ga ‘yan takarar jam’iyyar, ciki har da ɗan takarar shugaban ƙasa Peter Obi, mataimakinsa Dr. Rabiu Musa Kwankwaso, da sauran masu neman mukamai, da kada su fice daga jam’iyyar bayan hukuncin da Babbar Kotun Tarayya da ke Lokoja ta yanke kwanan nan.
Dickson ya bayyana hakan ne a cikin shirin Politics Today na gidan talabijin na Channels TV a ranar Lahadi, yayin da yake mayar da martani kan rahotannin da ke cewa wasu ‘yan takara na tunanin barin jam’iyyar sakamakon hukuncin kotun.
Takaddamar ta samo asali ne bayan hukuncin da Mai Shari’a Isah Dashen na Babbar Kotun Tarayya da ke Lokoja ya yanke a ranar Juma’a, inda ya soke hukuncin da kotun ta yanke a ranar 10 ga Disamba, 2025, wanda ya umarci Hukumar Zaɓe Mai Zaman Kanta ta Ƙasa (INEC) ta yi wa jam’iyyar NDC rajista a matsayin jam’iyyar siyasa.
Mai shari’ar ya bayyana cewa hukuncin da aka yanke a baya ya shafi haƙƙin jam’iyyar Peace Movement Party (PMP), wadda ta yi iƙirarin cewa tambarin da aka yi amfani da shi wajen neman rajistar NDC mallakinta ne, amma ba a shigar da ita cikin ƙarar ba.
Da yake mayar da martani kan fargabar da ake yi cewa wasu ‘yan takara sun damu da hukuncin kotun, Dickson ya yi watsi da wannan hasashe, yana mai tabbatar wa mambobin jam’iyyar cewa NDC na nan daram kuma tana ci gaba da tafiya kan tsarinta.
