Jagoran jam’iyyar ADC, Dino Melaye, ya bukaci Shugaba Bola Tinubu da iyalansa su fara tattara kayansu daga Fadar Shugaban Ƙasa, yana mai cewa jam’iyyar ADC za ta kayar da APC a zaɓen 2027.

Melaye ya ce yunwa, rashin tsaro, kashe-kashe da matsalolin tattalin arziki sun sa ’yan Najeriya ke ƙara nuna rashin gamsuwa da gwamnatin Tinubu.

Ya kuma zargi gwamnatin da gazawa wajen aiwatar da kasafin kuɗaɗe da kuma biyan wasu kuɗaɗen kwangilolin da aka bayar.

Melaye, wanda ya bayyana hakan a wata hira da gidan talabijin na Arise TV, ya ce sakamakon zaɓen 2027 zai nuna yadda ’yan Najeriya ke son sauyin gwamnati.

Ya kuma zargi Shugaba Tinubu da yin kalaman da ke nuna cewa magudi, tashin hankali da satar ƙuri’u abin yarda ne a siyasa, yana mai cewa hakan bai dace da matsayin shugaban ƙasa ba.