Shugaban Ƙaramar Hukumar Sabon Birni ta Jihar Sakkwato, Hashimu Dantudu, ya ce tura motocin sulke da gwamnatin jihar ta samar ya taimaka matuƙa wajen rage hare-haren ’yan bindiga a yankin.
Ya ce tun bayan tura motocin, an samu raguwar hare-hare tare da ƙara yawan jami’an tsaro da ake gani a yankin.
Dantudu ya bayyana hakan ne a ƙauyen Tsamaye, yayin ziyarar tawagar gwamnatin jihar da uban jam’iyyar na jihar, Aliyu Wamakko, ya jagoranta domin jajanta wa al’ummar yankin kan rasuwar shugaban APC na ƙaramar hukumar, Amadu Malale.
Shugaban ƙaramar hukumar ya yaba wa Gwamna Ahmed Aliyu bisa samar da motocin, yana mai cewa matakin ya ƙara ƙarfafa yaƙi da ’yan bindiga a jihar.
Ya kuma bayyana fatansa na cewa ci gaba da ƙoƙarin gwamnati wajen inganta tsaro zai taimaka wajen kawo ƙarshen ayyukan ’yan bindiga.
Gwamnatin Jihar Sokoto ta ce ta sayi motocin sulke 62 da babura 2,000, domin raba su ga hukumomin tsaro don ƙarfafa ayyukan yaƙi da ’yan bindiga da sauran masu aikata laifuka a jihar.
