Hukumar hana sha da fataucin miyagun kwayoyi ta Najeriya (NDLEA) ta ce ta kwace miyagun kwayoyi da darajarsu ta haura N3.4 biliyan, tare da kama wasu mutane a wasu jihohi da Abuja.
Hukumar ta ce ta kwace fiye da kwayoyin Tramadol da opioids miliyan 1.3, da kuma kusan kilogram 6,000 na tabar wiwi.
A tashar Tin-Can Island da ke Legas, NDLEA ta kwace buhunan Canadian Loud 1,200, masu nauyin kilogram 603.75 da darajarsu ta kai N1.81 biliyan.
A Delta, an kama wani mutum mai suna Innocent Ekpe, mai shekaru 49, bisa zargin yin sojan gona a matsayin babban dan sanda domin kauce wa binciken jami’ai. An kama shi dauke da kilogram 292.48 na tabar wiwi, yayin da wani abokin huldarsa shi ma aka kama.
A Edo kuma, NDLEA ta kama wani makanike, Matthew Ossai, mai shekaru 45, inda aka ce an samu kilogram 48 na Canadian Loud da gram 152 na methamphetamine a wajen gyaran motarsa.
Hukumar ta kuma ce ta kama wasu mutane tare da kwace fiye da kwayoyin Tramadol miliyan 1.1 a hanyar Abaji zuwa Abuja, yayin da aka kama wasu da tabar wiwi da sauran miyagun kwayoyi a Legas, Gombe, Imo da Ondo.
A jihar Ondo, jami’an hukumar sun lalata gonar tabar wiwi mai fadin hekta biyu, tare da kama mutane hudu.
Shugaban NDLEA, Brig.-Gen. Mohamed Buba Marwa (mai ritaya), ya yaba wa jami’an hukumar tare da umartar su da su ci gaba da gudanar da ayyukan yaki da miyagun kwayoyi bisa bayanan sirri.
