Jami’an Hukumar Hana Sha da Fataucin Miyagun Ƙwayoyi ta Ƙasa, NDLEA, sun kama wata tsohuwa mai shekara 101, Esther Ogunmabo, bisa zargin safarar miyagun ƙwayoyi a jihar Ogun.
An kama Ogunmabo a garin Ilisan, inda jami’an hukumar suka same ta da buhunan ƙwayar skunk, wani nau’in tabar wiwi, mai nauyin gram 90, wadda ta ce tana sayar wa mazauna yankin.
Kakakin NDLEA, Femi Babafemi, ya ce matar ta shaida wa jami’an cewa ta fara safarar ƙwayoyin ne bayan gobara ta kone shagon kayan masarufinta.
Ya ce ɗaya daga cikin ’ya’yan matar da ke zaune a Legas ce ke shirya kawo mata ƙwayoyin duk bayan kwanaki huɗu, sannan ita kuma ta riƙa sayar da su kaɗan-kaɗan.
Babafemi ya ce Shugaban NDLEA, Birgediya Janar Buba Marwa mai ritaya, ya bayar da umarnin a bayar da belin matar tare da sanya ta cikin shirin ba da shawara saboda tsufanta, yayin da aka kama ’yarta.
