Gwamnan Jihar Neja, Mohammed Umaru Bago, ya ce gonarsa tana biyan ma’aikatan da suka yi digiri mafi ƙarancin albashi na naira 500,000 a kowane wata.
Gwamnan, wanda ya bayyana kansa a matsayin manomi, ya bayyana hakan ne a Legas yayin bikin buɗe taron FirstBank Agric & Export Expo 2026, mai taken: “Daga gona zuwa kasuwannin duniya: Gina tsarin darajar fitar da kayayyakin Najeriya zuwa ƙasashen waje.”
Bago ya bayyana irin damar da harkar noma ke da ita, musamman kiwo, a matsayin wata babbar hanyar samar da ayyukan yi da bunƙasa tattalin arziki.
A cewar gwamnan, albashin da ake biyan ma’aikata a gonarsa ya fi abin da ma’aikatan gwamnati da dama ke samu.
