Jam’iyyar APC reshen jihar Zamfara ta musanta rahotannin da ke cewa Gwamna Dauda Lawal ya gabatar mata da wata takarda da ke nuna aniyarsa ta komawa cikin am’iyyar.
Jam’iyyar APC ta reshen jihar Zamfara ta bayyana rahoton a matsayin kirkiren labari, a cikin wata sanarwa da ta fitar a daren Juma’a, Sakataren Yaɗa Labarai na jam’iyyar ta APC a jihar, Mallam Yusuf Idris, ya ce batun mika takardar ya fito daga wani mai amfani da kafafen sada zumunta ba daga majiya mai tushe ba.
Idris ya bayyana rahoton a matsayin wanda ba shi da tushe, ya kuma gargadi wadanda ke yada labaran karya da gangan domin kawar da hankalin jama’a da kuma haifar da tashin hankali mara amfani a cikin jam’iyyar da su daina kokuma su fuskanci hukunci.
Ya jaddada cewa jam’iyyar APC reshen jihar Zamfara bata karbi wata takarda a hukumance daga Gwamnan Dauda Lawal ko wani jami’in gwamnati ba, hakazalika zuwa yanzu Babu wata alama dake juna cewa Gwamnan zai bar jam’iyya Mai mulkin jihar ta PDP zuwa APC ba.
Mai magana da yawun jam’iyyar ya bukaci ‘yan APC da sauran jama’a, musamman mazauna Jihar Zamfara, da su yi watsi da rahoton gaba ɗaya, yana mai bayyana shi a matsayin wani abu da aka shirya don haifar da rudani.
