Kotun daukaka kara dake Abuja ta yi fatali da karar da hukumar kula da kafafen yada labarai ta kasa NBC ta shigar domin kalubalantar hukuncin babbar kotun tarayya da yah ana mata cin tarar gidajen radio da television a fadin kasar nan.
Da yake zartas da hukuncinsa, mai shari’a Oyebiola Oyewumi, a madadin sauran alkalan kotun su uku, ya tabbatar da hukuncin da ya soke tarar da NBC ta ci wasu kafafen yada labarai 45 a ranar 1 ga watan Maris na 2019 saboda sabawa dokokin yada labarai na Nigeria.
A wani bayani da jami’in yada labarai na kungiyar MRA, Idowu Adewale ya fitar, ya ce hukuncin kotun na zuwa ne bayan karar da kungiyar ta shigar a watan Nuwamban 2021, inda ta kalubalanci NBC wajan cin tarar kafafen yada labarai.
A hukuncin da babbar kotun tarayya ta zartas a ranar 10 ga watan Mayin 2023, mai shari’a James Omotosho, ya amince da bukatar MRA bayan hukumar NBC ta kasa kare kanta.
Kotun ta ce ana cin tara ne kan mutanen da aka kama da laifi, kuma a karkashin dokokin Nigeria, kotuna ne kadai ke da hukuncin ayyana tara kan mutum.
