Mataimakin Shugaban Kasa, Kashim Shettima, ya gargadi magoya bayan jam’iyyar APC da su guji haddasa rarrabuwar kai gabanin zabukan fidda gwani na 2027.

Jaridar TheCable ta rawaito cewa, Shettima ya ce akwai masu neman tayar da fitina da za su iya haddasa rikici a cikin jam’iyyar, yana mai kira ga shugabanni da ‘yan takara da su rungumi hadin kai da juriya.

Ya jaddada cewa jam’iyya ba filin yaki ba ce, illa gida daya da ya kamata a kiyaye.

Ya kuma bukaci a gudanar da zabukan cikin gaskiya da adalci, tare da bai wa ‘yan takara da wakilai damar yin zabi cikin ‘yanci. A cewarsa, nasarar jam’iyya ba za ta tabbata ba sai idan an kasance cikin hadin kai.

Mataimakin shugaban kasar ya kara da cewa rikice-rikicen cikin gida na iya raunana APC kafin babban zabe, yana mai kira ga kowa da kowa da ya nuna hakuri, ladabi da mutunta juna domin cimma nasara.