Shugaban kasa Bola Tinubu ya isa birnin Legas domin hutun karshen shekara.

Tsohon gwamnan jihar Legas din ya isa filin jirgin saman Murtala Muhammad da daren jiya Assabar, bayan ziyarar da ya kai a jihohin Borno da Bauchi.

Gwamna Babajide Sanwo-Olu na Legas ne ya tarbe sa tare da rakiyar sauran jami’an gwamnatin jihar.

Kazalika an tanadi masu kade-kade da su ka yiwa shugaban rakiya har zuwa cikin birnin Ikko, inda zaiyi hutunsa na sabuwar shekara.

Mai Magana da yawunsa, Bayo Onanuga ya ce magidansa zai halarci taruka daban-daban ciki har da bukin al’ada na Eyo.

Zai kuma karbi manyan mutane daga sassan kasar nan wadanda za su rinka kai masa ziyarar murnar sabuwar shekara.