Rundunar sojin Najeriya ta Operation Hadin Kai ta ce ta hallaka ’yan ta’adda 1,106 na Boko Haram da ISWAP, tare da cafke sama da naira miliyan 300 da aka samu daga haramtattun kudade na masu daukar nauyin ’yan ta’addan.

Kwamandan rundunar Operation Hadin Kai mai barin gado, Manjo Janar Abdulsalam Abubakar, ne ya bayyana hakan yayin jawabinsa na bankwana da aka gudanar a Maimalari Cantonment da ke Maiduguri, Jihar Borno.

A cewar kwamandan mai barin gadon, wasu manyan hare-haren soji da aka gudanar sun kuma kai ga cafke akalla mutane 758 da ke taimakawa kungiyoyin ’yan ta’addan wajen samar musu da kayayyakin aiki da sauran bukatu.

Ya danganta nasarorin da aka samu a ayyukan sojin da hadin gwiwar matsin lamba na soji da ake ci gaba da yi, tare da ingantattun hanyoyin tattaunawa da sauran matakan da ba na amfani da karfin soji ba.