Rundunar Sojin Najeriya ta Division 8 ta kashe wani fitaccen kwamandan ’yan bindiga, Kachalla Kallamu, a Karamar Hukumar Sabon Birni dake Jihar Sokoto.

Wata majiyar tsaro, ta tabbatar da faruwar lamarin ga manema labarai a ranar Talata, Inda rundunar ta bayyana hakan a matsayin babban nasara a yakin da take ci gaba da yi da ta’addanci a Arewa maso Yamma.

Majiyar, wacce ta nemi a sakaya sunanta, ta bayyana cewa Kallamu, wanda ya kasance amintacce kuma daya daga cikin hannun daman shugaban ’yan ta’adda Bello Turji ne, ya gamu da ajalisa a wani gagarumin samame da dakarun Division ta 8 suka kaddamar tare da hadin gwiwar yan banga na yankin.

Rahoton ya ce an hallaka Kallamu tare da daya daga cikin manyan masu samar wa Turji kayayyaki a daren Litinin, yayin wani farmaki da sojojin suka kai kauyen Kurawa.

Dan ta’adda Kallamu, dan asalin Garin-Idi a yankin Sabon Birni ne, wanda ya dade yana addabar al’ummomin shiyyar gabashin Sakkwato, inda hare-harensa suka tilastawa jama’a barin gidajensu tare da haifar da tsananin tsoro da furgici.