Tsohon mai taimaka wa marigayi tsohon Shugaban Ƙasa Muhammadu Buhari kan harkokin yaɗa labarai, Bashir Ahmad, ya yi hasashen cewa ɗan takarar shugaban ƙasa na jam’iyyar NDC, Peter Obi, zai sake komawa wata jam’iyya.

Ahmad ya ce kamar yadda Obi ya yi wa Labour Party, haka zai bar NDC ya koma wata jam’iyya yayin da ake tunkarar zaɓen shugaban ƙasa na shekarar 2031.

A wani saƙo da ya wallafa a shafinsa na X, tsohon hadimin shugaban ƙasar ya ce Obi ba zai taɓa ci gaba da zama a jam’iyyar da ba zai iya cimma burinsa na siyasa a cikinta ba.

Tsohon gwamnan Jihar Anambra ya tsaya takarar shugaban ƙasa a zaɓen shekarar 2023 a ƙarƙashin inuwar Labour Party (LP).

A watan Disambar 2025, Obi ya fice daga LP ya koma ADC sakamakon rikicin shugabanci da ya dabaibaye jam’iyyar.

Bayan wasu watanni kaɗan, Obi ya sake ficewa daga ADC zuwa NDC, inda ya zama ɗan takarar shugaban ƙasa na jam’iyyar, tare da Rabiu Kwankwaso a matsayin mataimakinsa.