Jam’iyyar ADC ta fara shirin aikin rajistar sabbin mambobi da sabunta rajista ga mambobinta na tsawon kwana 90 a faɗin ƙasar nan.

Wata sanarwa da Sakataren yaɗa labaran jam’iyyar na ƙasa, Bolaji Abdullahi, ya fitar a ranar Asabar, ta ce wannan mataki ya biyo bayan kammala taron kwamitin gudanarwar jam’iyar na ƙasa da aka yi a ranar 27 ga Nuwamba, 2025.

Jam’iyyar ta kuma bayyana ranakun wucin gadi na gudanar da tarukan jam’iyya da zaɓen wakilai a matakan rumfar zaɓe, mazabu da kuma ƙananan hukumomi.

A cewar wata wasiƙa daga Sakataren jam’iyyar na ƙasa, Rauf Aregbesola, za a gudanar da tarukan tsakanin 20 zuwa 27 ga Janairu, 2026, kafin a kammala da babban taron ƙasa mara zaɓe a Faburairu 2026 a Abuja.

Jam’iyyar ta ce wannan shiri na da muhimmanci wajen ƙarfafa jam’iyyar da tsarin gudanarwarta a faɗin ƙasa, tare da jaddada bin doka, gda dimokiraɗiyyar a fadin kasar nan.