Ƴan bindiga sun yi garkuwa da wasu yan uwa ciki ɗaya sj uku a karamar hukumar Ohimini da ke jihar Benue, yayin da suke kan hanyarsu daga Abuja zuwa garinsu domin kai gawar mahaifiyarsu da ta rasu domin a yi mata jana’iza.

Daily Trust ta rawaito cewa lamarin ya faru ne da sanyin safiyar Asabar a kan titin Ogobia–Otukpo, bayan motar da suke ciki ta samu matsala, lamarin da ya tilasta musu tsayawa a hanya.

Bayan an gyara motar suka ci gaba da tafiya, sai suka ci karo da maharan, wadanda suka yi garkuwa da ‘yan uwan uku. An ce mazauna yankin sun ji karar harbe-harbe tsakanin karfe 3:00 zuwa 4:00 na asubahin ranar.

Shugaban karamar hukumar Ohimini, Gabriel Adole, ya tabbatar da faruwar lamarin, yana mai cewa ya nufi wurin domin tantance abin da ya faru.

Daily Trust ta ce har zuwa lokacin hada rahoto, rundunar ‘yan sandan jihar Benue ba ta fitar da wata sanarwa kan lamarin ba.