A wani yunkuri na ganin an saukakawa ma’aikatan Jihar nan,domin su fara azumin watan Ramadan mai alfarma na bana cikin walwala, Mai Girma Gwamnan Jihar Sokoto, Ahmed Aliyu Sokoto, PhD, FCNA, ya amince da biyan albashin watan Fabrairu nan take, wanda zai fara daga gobe Juma’a, 13 ga Fabrairu, 2026.
Kamar yadda aka saba, biyan albashin ya shafi ma’aikatan Gwamnatin Jiha, Kananan Hukumomi, ma’aikatan Hukumar Ilimi ta Kananan Hukumomi (LGEA), da kuma tsofaffin ma’aikata masu karɓar fansho a faɗin jihar.
A bisa ga haka,Gwamnan jiha Ahmed Aliyu Sokoto, ya bukaci ma’aikatan gwamnati da su sakawa wannan karamci da sauran alheran da gwamnatin jiha ke yi musu, ta hanyar nuna ƙwazo da jajircewa wajen aiwatar da ayyukansu.
