Kwamitin wucin gadi na Majalisar wakilai mai bincike kan haƙar ma’adinai, tsaro da yaƙi da almundahanar kuɗi ya bayyana cewa haƙar ma’adinai ba bisa ƙa’ida ba na ƙara ta’azzarar rashin tsaro, almundahanar kuɗi da kuma rage wa gwamnati kuɗaɗen shiga.
Shugaban kwamitin, Sani Abdulraheem, ya bayyana haka a wani taron masu ruwa da tsaki kan inganta tsarin tafiyar da harkokin ma’adinai da aka gudanar a Abuja.
Ya ce ƙungiyoyin masu aikata laifuka na cin gajiyar raunin dokoki da rashin ingantaccen sa ido wajen satar albarkatun ma’adinai, lamarin da ke hana Najeriya amfana da dimbin arzikin da take da shi.
Abdulraheem ya ce kwamitin ya fara bincike kan girman matsalar haƙar ma’adinai ba bisa ƙa’ida ba, hanyoyin da ake amfani da su wajen halasta kuɗaɗen haram da kuma tsarin tsaron yankunan da ake haƙar ma’adinai.
Ya kuma buƙaci hukumomin tsaro, masu yaƙi da cin hanci, ma’aikatar ma’adinai, gwamnatocin jihohi da sauran masu ruwa da tsaki su haɗa kai domin kawo ƙarshen matsalar, yana mai tabbatar da cewa binciken ba zai hana masu lasisin haƙar ma’adinai gudanar da halastattun ayyukansu ba.
