Wani uba mai ’ya’ya biyu ya bayyana cewa tsananin soyayyar da yake yi wa matarsa ta shafi yadda yake mai da hankali wajen gudanar da aikinsa.

Aminu Kabiru ya bayyana hakan ne a gaban wata Kotun Shari’a da ke Kaduna, a Jihar Kaduna, yayin da yake mayar da martani kan bukatar matarsa da suka rabu, wadda ta nemi a raba aurensu ta hanyar Khul’i.

A cewar kamfanin Dillancin Labaran Najeriya (NAN), Aminu ya shaida wa kotun cewa ƙaunar da yake yi wa matarsa ta yi masa yawa matuƙa, har ta kai ga shagaltar da shi daga aikinsa tare da rage masa damar samun kuɗin shiga.

Wanda ake ƙara ya roƙi kotun da ta ba shi ƙarin lokaci domin ya sasanta da matarsa, yana mai cewa ya kamata a ceto aurensu saboda ƙananan ’ya’yansu.

Ya buƙaci kotun ta yi la’akari da jin daɗin yaran, waɗanda dukkansu ba su kai shekara biyu ba.

Sai dai matar tasa, ta hannun lauyanta, Abubakar Jibril, ta dage cewa ba ta son ci gaba da zaman auren.

Jibril ya shaida wa kotun cewa matar ta kwashe watanni takwas tana zaune a gidan iyayenta, ba tare da mijin nata ya ba ta kulawa ko tallafin da ya dace ba.