Tsohon Gwamnan Kano kuma dan takarar mataimakin shugaban kasa na jam’iyyar NDC a 2027, Rabiu Kwankwaso, ya jajanta wa iyalan wadanda suka mutu a hatsarin kwale-kwale da ya afku a Gorau, karamar hukumar Goronyo ta Jihar Sokoto.

Kwankwaso ya bayyana hatsarin da ya yi sanadin mutuwar mutane da dama a matsayin abin takaici, tare da yin kira ga hukumomi da su gudanar da cikakken bincike kan musabbabin hatsarin.

A cewar rundunar ‘yansandan jihar, mutane 77 ne ke cikin kwale-kwalen da ya kife yayin da yake dauke da manoma da sauran fasinjoji zuwa gonakinsu.

Ya zuwa yanzu, an gano gawarwaki 46, yayin da aka ceto mutane 15 da ransu, sannan ake ci gaba da neman wasu 16 da suka bace.

Kwankwaso ya kuma yaba wa jami’an tsaro, masu aikin ceto da masu ruwa na yankin bisa kokarin da suke yi na ceto wadanda suka tsira da kuma gano wadanda suka bace.

Ya bukaci hukumomi su dauki matakan tsaro na musamman a hanyoyin ruwa domin hana sake aukuwar irin wannan mummunan hatsari.