Mai ba shugaban kasa Bola Tinubu shawara kan harkokin siyasa da sauran al’amura, Ibrahim Masari, ya ce kusan malaman addinin Musulunci da shugabannin addini 500 daga jihohin Arewa 19 da Abuja sun amince da sake tsayawa takarar Tinubu a zaben shugaban ƙasa na 2027.
Masari ya bayyana hakan ne bayan halartar taron Northern Muslim Intellectual Forum da aka gudanar a Dutse, Jihar Jigawa.
Ya ce mahalarta taron sun tattauna matsalolin tsaro, tattalin arziki, ababen more rayuwa da ci gaban yankin Arewa, inda suka bayyana gamsuwa da matakan da gwamnatin Tinubu ke ɗauka.
A cewar Masari, mahalarta taron sun kada kuri’ar amincewa da Tinubu tare da kira ga ‘yan Najeriya, musamman al’ummar Arewa, da su goyi bayan sake zabensa da sauran ‘yan takarar jam’iyyar APC a 2027.
Taron ya samu halartar gwamnonin Jigawa, Kano, Yobe, Sokoto da Kaduna, da Mataimakin Shugaban Majalisar Dattawa, Barau Jibrin, da Ministan Gidaje, Muttaka Darma.
