Sarkin Bauchi, Rilwanu Adamu, ne ya naɗa tsohon shugaban ƙasar a wani biki da aka gudanar a ranar Talata a fadar Sarkin Bauchi da ke cikin birnin Bauchi.

Jaridar PUNCH ta rawaito cewa an karrama Jonathan ne bisa gudunmawar da ya bayar wajen ƙarfafa dimokuraɗiyya, zaman lafiya da haɗin kan ƙasa a Najeriya.

Sarkin Bauchi ya bayyana Jonathan a matsayin shugaba nagari, tare da yabawa ƙoƙarinsa na inganta zaman lafiya da dimokuraɗiyya a ƙasar.

Da yake jawabi a wajen taron, Gwamnan Jihar Bauchi, Bala Mohammed, wanda ya jagoranci tawagar jami’an gwamnati da sauran manyan baki zuwa fadar sarkin, ya gode wa masarautar bisa karrama tsohon shugaban ƙasar.

Gwamna Bala ya ce naɗin sarautar ya nuna irin yadda aka amince da gudunmawar Jonathan wajen ci gaban dimokuraɗiyya da haɗin kan ƙasa.

Ya ƙara da cewa jagorancin Jonathan da gudunmawar da ya bayar ga ƙasa sun cancanci a yaba tare da karrama shi.

A nasa jawabin, Jonathan ya gode wa Sarkin Bauchi da al’ummar jihar bisa karramawar da aka yi masa.

Tsohon shugaban ƙasar ya ce ya ji daɗi matuƙa da wannan karramawa, yana mai cewa zai ci gaba da mutunta dokoki, al’adu da al’adun Masarautar Bauchi, tare da kiyaye martabar sarautar da aka naɗa shi.

Jonathan ya kasance a Bauchi tun ranar Lahadi, inda a ranar Litinin ya ƙaddamar da wasu ayyukan tituna da gwamnatin Gwamna Bala Mohammed ta aiwatar.