Mataimakin ɗan takarar shugaban ƙasa na jam’iyyar Nigeria Democratic Congress (NDC), Dakta Rabiu Musa Kwankwaso, ya tabbatar da cewa ɗan takarar shugaban ƙasar na jam’iyyar, Peter Obi, ya sanya hannu kan yarjejeniyar yin wa’adi ɗaya na shekaru huɗu kacal idan ya lashe zaɓen 2027.

Kwankwaso ya bayyana haka a wata hira da gidan talabijin na Channels, inda ya ce yarjejeniyar ta tanadi cewa bayan wa’adin Obi daga 2027 zuwa 2031, mulkin shugaban ƙasa zai koma yankin Arewa bisa tsarin rabon mulki da jam’iyyar ta amince da shi.

Ya ce shi da Obi sun rattaba hannu kan wata yarjejeniya ta musamman baya ga wadda jam’iyyar ta yi, yana mai bayyana cewa yana da cikakken yaƙinin Obi zai cika alƙawarin.

Kwankwaso ya ƙara da cewa ya amince ya zama mataimakin ɗan takarar shugaban ƙasa ne saboda fahimtar cewa yankin Kudu zai riƙe mulki na wa’adi ɗaya kawai kafin a mayar da shi Arewa.

Ya kuma ce a halin yanzu jam’iyyar ta fi mayar da hankali kan lashe zaɓen 2027, yayin da take da tsare-tsaren siyasa na matsakaici da na dogon lokaci. A baya dai Peter Obi ya bayyana cewa idan aka zaɓe shi shugaban ƙasa, zai yi wa’adi ɗaya ne kawai domin inganta zaman lafiya da haɗin kan ƙasa.