Gwamnatin Amurka ƙarƙashin jagorancin Donald Trump, ta sanar da sanya sabbin takunkuman hana shiga ƙasar ga wasu ƙasashe 7, ciki har Burkina Faso da Mali da kuma Jamhuriyar Nijar bisa dalilai na tsaro.

A cikin wata sanarwa da fadar White House ta fitar, ta ce ƙasashe 7 da wannan doka ta shafa sun haɗa da Burkina Faso da Mali da Nijar da Sudan ta Kudu da Syria da masu riƙe da takardun sheda daga hukumomin Falasɗinu, sai kuma Laos da Saliyo waɗana a baya aka sanya musu dokar ta wucin gadi.

Fadar da White House ta ce wannan sabuwar doka da za ta fara aiki a ranar 1 ga watan Janairu mai zuwa, an samar da ita ne don taimakawa wajen bai wa Amurkawa kariya daga duk wata barazanar tsaro.

Dama a watan Yunin wannan shekarar ne Trump ya sanya hannu kan wata dokar haramta wa ƴan wasu ƙasashe 12 shiga Amurka, tare da takaita ta wasu 7 da ta shafi masu yawon bude ido da ɗalibai da kuma ƴan kasuwa.