Gwamnatin Afghanistan ta ce wasu hare-hare da dakarun Pakistan su ka kai da sanyin safiyar wanan lahadi cikin ƙasar sun kashe gomman mutane da raunata wasu da dama.

Ministan tsaron Pakistan ya faɗa a wanan lahadi cewa an kai hare-haren ne bayan samun bayanai sirri a gameda wuraren da ƴanta’adda suka ɓuya ba tare da yin karin haske ba.

Sai dai a nata bangare gwamnati Afghanistan ta ce harin na Pakistan ya faɗa kan fararen hula ciki har da mata da yara kanana a lardunan Nangarhar da Paktika.

Ba wanan ne karon farko da ake samun dagulewar lamurra a kan iyakar kasashen biyu wato Pakistan da Afghanistan.

Ko a watan octoban shekara 2025 bangarorin biyu sun yi asarar gomman rayuka a wani rikicin da ba’a taɓa ganin irinsa ba da ya ɓarke tsakaninsu.