Dakarun Operation Hadin Kai sun ceto mutane 47, mafi yawansu mata da yara, daga hannun mayakan Ƙungiyar Daular Musulunci ta Yammacin Afirka ISWAP a sansanin ƙungiyar da ke Kangarwa, ƙaramar hukumar Kukawa ta Jihar Borno.

An gudanar da wannan aikin ceto ne a ranar 20 ga Yuni.

An bayyana hakan ne cikin wata sanarwa da Mukaddashin Jami’in Yaɗa Labarai na Hedikwatar Rundunar Haɗin Gwiwa ta Arewa maso Gabas, Operation Hadin Kai, Kyaftin Mohammed Goni, ya fitar a ranar Litinin.

Goni ya ce waɗanda aka ceto sun samu ‘yancinsu ne sakamakon ci gaba da hare-haren da sojoji ke kai wa maboyar ‘yan ta’adda a yankin Tafkin Chadi.