Dakarun Operation Hadin Kai sun dakile yunkurin da mayaƙan ISWAP su ka yi na yunkurin kutsawa wasu unguwanni da ke kusa da babban birnin jihar Borno, Maiduguri a safiyar yauJuma’a.

Mai magana da yawun rundunar, Kyaftin Muhammad Goni, ya ce unguwannin da lamarin ya shafa sun haɗa da Muna Garage, Shuwari Village da Ajilari Cross, inda ‘yan ta’addan suka yi ƙoƙarin shiga Maiduguri tsakanin ƙarfe 12:20 na dare zuwa 2:30 na safe.

Ya bayyana cewa dakarun sun gano motsin maharan tun da wuri, inda su ka buɗe musu wuta daga wurare daban-daban, lamarin da ya tilasta su ka tsere.

Haka kuma, ina ji Goni, sojojin sun dakile wani yunkuri na yan ta’addan na kutsawa yankunan Miringa da Dutsen Kura da ke Buratai.
Goni ya ce a halin yanzu dakarun na ci gaba da gudanar da sintiri da bincike domin bibiyar maharan da suka tsere tare da tabbatar da tsaron al’ummomin yankin.

Ya kuma bukaci jama’a su ci gaba da bai wa jami’an tsaro sahihan bayanai domin tallafa wa yaƙi da ta’addanci a Arewa maso Gabas.