‘Yan bindiga sun kashe aƙalla manoma tara a wani hari da suka kai wani ƙauye a Jihar Kaduna da ke arewa maso yammacin Najeriya, sannan suka yi garkuwa da “mutane da dama”, kamar yadda wani rahoton tsaro da kamfanin dillancin labarai na AFP ya gani a ranar Lahadi, tare da bayanan wata majiya daga yankin suka nuna.
Makonni kaɗan bayan fara daminar bana, ‘yan ta’adda da ƙungiyoyin masu aikata laifuka — masu garkuwa da mutane domin neman kuɗin fansa da kuma barayin shanu da aka fi sani da ‘yan bindiga — sun ƙara kai hare-hare kan al’ummomin manoma a arewa da tsakiyar Najeriya waɗanda suka ƙi biyan harajin da suke ƙaƙaba musu.
Jihar Kaduna na ɗaya daga cikin jihohin arewa da tsakiyar Najeriya da waɗannan ƙungiyoyin ke addabawa, inda suke kai hare-hare kan ƙauyuka, su kashe mutane, su yi garkuwa da su domin neman kuɗin fansa, sannan su wawashe gidaje kafin su ƙona su.
Wani rahoton tsaro da aka tanada domin Majalisar Ɗinkin Duniya, wanda AFP ta gani a ranar Lahadi, ya ce maharan sun kai hari gonakin da ke wajen ƙauyen Kakangi a Ƙaramar Hukumar Birnin Gwari ranar Asabar, inda suka harbe manoma yayin da suke aiki a gonakinsu.
Rahoton ya ce, “An gano gawarwakin mutum tara zuwa yanzu, yayin da hukumomin yankin suka tabbatar da gano shida daga cikin waɗanda aka kashe.”
Kabiru Ishaq, wani shugaban al’umma a Birnin Gwari, mai nisan kusan kilomita 60 (mil 37) daga ƙauyen, wanda ya kai ziyara domin jajanta wa al’ummar yankin, ya ce mutum 10 ne aka kashe.
