Ana sa ran Majalisar Dattawan Najeriya za ta tattauna cece-kucen da suka biyo bayan ware wa wata hukuma da ake zargi da kasancewa bogi mai suna Presidential Foreign Intervention Promotion Council kuɗi har Naira biliyan 1.3 a cikin kasafin kuɗin shekarar 2026, a zamanta na ranar Talata.
Jaridar The PUNCH ta ruwaito cewa batun ya janyo cece-kuce bayan bayanai sun nuna cewa an saka wa hukumar kuɗaɗen kasafi duk da zargin cewa ba halastacciyar hukuma ba ce.
Rahotanni sun kuma nuna cewa an karɓi wata wasiƙar naɗi ta bogi mai ɗauke da sa hannun jabu na Shugaban Ma’aikatan Fadar Shugaban Ƙasa, Femi Gbajabiamila, a Hedikwatar Ma’aikatan Gwamnatin Tarayya ba tare da cikakken tantancewa ba.
Lamarin ya bai wa wani mutum mai suna Prince Adeniyi Adeyemi Mathew damar samun ofishi a rukunin Sakatariyar Gwamnatin Tarayya da ke Abuja, inda hukumar ta ci gaba da aiki kamar halastacciyar hukuma ta gwamnati na fiye da shekara guda.
Ana sa ran tattaunawar Majalisar Dattawa za ta mayar da hankali kan yadda aka samu wannan tangarɗa da matakan da za a ɗauka kan lamarin.
