Rundunar yansandan jihar Niger ta kama mutum biyu da ake zargi da safarar mutane, inda ta ceto yan mata 9 da wani jinjiri dan wata 4 da aka kwace a hannun mahaifiyarsa a cikin garin Minna. 

A wani bayani da kakakin rundunar, SP Abiodun Wasiu ya fitar, ya ce a ranar 9 ga watan Yuli, jami’an ofishin yansanda na Madalla dake aikin sintiri kan hanyar Madalla zuwa Suleja, sun kama wani mai suna Dauda Ayuba dake zaune a kauyen Kaffin-Koro a karamar hukumar Paikoro, inda ya ke kokarin safarar yan mata 6, yan tsakanin shekara 7 zuwa 13. 

A lokacin bincike, Ayuba ya ce ya taso ne daga Benin na jihar Edo, bayan ya kulla harkalla da wata mata mai suna Iyee da wasu mutum 2 a kasuwar Ogbu, wadanda yanzu haka suka tsere, domin a kawo musu yaran. 

A cewar Ayuba, ya karbi naira 194,000 a matsayin kudin sufuri domin kai yaran a Benin, inda za su yi aikatau da talla. 

Ayuba ya ce ya yaudari iyayen yaran ne a kauyen Senchi, ta hanyar yi musu alkawarin saka yaran a makaranta, kazalika ya ce zai samu kamishon naira 10,000 ga kowace yarinya da za a biya albashin naira 20,000. 

kg