Barkewar zazzabin Lassa da ake samu a Najeriya na nuna karuwar mace-mace mai tayar da hankali, inda sabbin alkaluma daga cibiyoyin jinya da sa ido na kasa ke nuna cewa ba yaduwa kadai ake samu ba har ma da karin mace-mace a jihohi da dama.

Sabbin alkaluma daga hukumar dakile cutuka masu yaduwa da ta kasa (NCDC) sun nuna cewa an samu sama da mutum 500 da aka tabbatar sun kamu da cutar da kuma wadanda suka mutu 146 tsakanin watan Janairu zuwa tsakiyar Maris din nan.

Haka kuma NCDC ta ce akalla ma’aikatan lafiya 38 sun kamu a wannan barkewar, inda akalla uku suka mutu — abin da masana ke cewa yana nuna hadarin aikin su da kuma gazawar tsarin kariya daga kamuwa da cutar.

Rahoton ya nuna cewa yawan mace-mace ya kai kashi 25.1, wanda ya fi kashi 18.7 da aka samu a irin wannan lokaci a shekarar 2025, lamarin da kekara nuna cewa ana samun karin masu kamuwa na mutuwa duk da kokarin da ake yi.