Mutane 28 da aka yi garkuwa da su a ranar 21 ga Disamba, 2025, a al’ummar Zak da ke gundumar Bashar a ƙaramar hukumar Wase ta Jihar Plateau, sun sami ’yanci bayan masu garkuwar sun sake su.

Waɗanda abin ya rutsa da su da suka haɗar da maza, mata da yara, suna kan hanyarsu ta zuwa garin Sabon Layi a gundumar Bashar domin halartar bikin Mauludi, lokacin da aka yi garkuwa da su.

Bayan faruwar lamarin, masu garkuwar sun tuntubi ’yan uwan waɗanda aka sace, inda suka nemi kudin fansa na Naira miliyan 1.5 ga kowane mutum, amma ’yan uwan suka ce ba su da ikon biyan wannan kuɗi, tare da roƙon a sake su.

Daga bisani, masu garkuwar sun rage kuɗin fansar zuwa Naira miliyan 30, amma suka buƙaci a ƙara babura sabbi guda uku a matsayin ƙarin sharadi.