Gwamnatin Jihar Sokoto ta bayyana cewa ba ta da wata alaƙa da wani mutum da ake kira Mai Shaho, bayan wani bidiyo da ake yaɗawa a kafafen sada zumunta ya jawo ce-ce-ku-ce.

Daraktan Yaɗa Labaran Gwamnan Jihar Sokoto, Abubakar Bawa, ya ce gwamnatin ta nisanta kanta gaba ɗaya daga mutumin da duk wasu ayyukansa.

A cewarsa, matakin ya biyo bayan wani faifan bidiyo da ake zargin Mai Shaho ya fitar, inda aka nuna shi yana binne bunsuru da ransa tare da yin wasu kalamai da suka shafi ɗan takarar gwamna na wata jam’iyyar siyasa a jihar.

Sanarwar ta ƙara da cewa gwamnatin ba ta goyon bayan bokanci ko duk wani aiki da ya saɓa wa doka, kyawawan ɗabi’u da koyarwar addinin Musulunci.

Haka kuma, gwamnatin ta umarci Hukumar Hisbah ta Jihar Sokoto da ta ɗauki matakin da ya dace bisa tanadin doka kan lamarin.