Dakarun rundunar haɗin gwiwa ta Operation FANSAN YAMMA sun ceto mutum biyar daga cikin iyalan shugaban karamar hukumar Bungudu ta Jihar Zamfara, Alhaji Nura Umar Abdullahi, bayan harin da ‘yan ta’adda suka kai gidansa tare da yin garkuwa da shi.

A cewar rundunar, sojoji sun isa wurin da gaggawa bayan jin karar harbe-harbe, inda suka fafata da maharan. Hakan ya tilasta wa ‘yan ta’addan barin matar shugaban ƙaramar hukumar, mahaifiyarsa, ‘ya’yansa biyu da wani ɗan uwansu, waɗanda aka ceto ba tare da sun ji rauni ba.

Sai dai maharan sun tsere da shugaban ƙaramar hukumar zuwa cikin daji. Harin ya yi sanadin mutuwar ‘yan sanda biyu, ɗan kungiyar sa-kai guda da wani farar hula, yayin da ɗan uwan shugaban ƙaramar hukumar ya samu raunuka.

Rundunar ta ce ta ƙaddamar da haɗaɗɗen samame tare da haɗin gwiwar ‘yan sanda, jami’an DSS da masu sa-kai domin ceto shugaban ƙaramar hukumar, tare da tabbatar da cewa za ta ci gaba da farautar maharan har sai an kuɓutar da shi tare da gurfanar da masu hannu a harin a gaban doka.