Rahotanni daga majiyoyi masu alaƙa da iyalansa, sun tabbatar da cewa dattijon ya riga mu gidan gaskiya ne a safiyar yau Alhamis, a wani asibiti da ke birnin tarayya Abuja, bayan ya shafe lokaci yana fama da rashin lafiya.

Marigayin, shi ne ke riƙe da babban muƙamin sarautar Sardaunan Sokoto bayan rasuwar Sir Ahmadu Bello a shekarar 1966.

Alhaji Abubakar Alhaji ya yi aiki a matsayin Ministan Tsare-tsare da Kuɗi na ƙasa a lokacin mulkin soja ƙarƙashin Janar Ibrahim Badamasi Babangida.

Haka zalika, ya taɓa zama babban jakadan Najeriya a ƙasar Birtaniya, daga 1992 zuwa tsakiyar 1996.

Shugaban ƙasa na mulkin soja, Janar Ibrahim Babangida, ne ya naɗa shi wannan muƙami nan da nan bayan ya cire shi daga kujerar Ministan Kuɗi a shekarar 1992.

Gwamnatin mulkin soja ta Janar Sani Abacha ce ta maye gurbinsa a wannan lokacin. Bayan saukarsa daga wannan kujera ne kuma aka naɗa Ambasada Uche Okeke a matsayin wanda ya gaje shi a ofishin jakadancin da ke birnin Landan.

Marigayi Alhaji Abubakar Alhaji, jika ne na jinin masarauta kai-tsaye daga tsatson Shehu Usmanu Ɗanfodiyo.